Cineál poist: Buan

Rúnaí Oifige

Scríofa ag Alex Hijmans ar 11 Márta 2026.

Tá Rúnaí Oifige ag teastáil ó Comhlucht Forbartha na nDéise i nGaeltacht na nDéise ar feadh 10 uair a chloig thar 3 lá sa seachtain. Pá @ €15 in aghaidh na huaire. Na príomh dualgais a bheidh ag an Rúnaí Oifige ná:

A bheith mar chéad pointe teagmhála do CFnaD, fón agus r-phoist a fhreagairt, agus comhfhreagras a chur ar aghaidh, de réir mar is cuí;
Tacaíocht riaracháin a chur ar fáil don fhoireann
Cruinnithe a eagrú, clár agus cáipéisí do chruinnithe a ullmhú, agus cáipéisí do chruinnithe a roinnt;
Miontuairiscí a ghlacadh le linn cruinnithe;
Comhaid CFnaD a chur in eagar;
Scarbhileoga a ullmhú agus a nuashonrú de réir mar is cuí;

Beidh na scileanna agus taithí seo a leanas ag teastáil ón té a cheapfar mar Rúnaí Oifige:

Scileanna maithe cumarsáide Gaeilge agus Béarla, idir labhartha agus scríofa;
Tuiscint agus taithí mhaith ar riaradh oifige;
Dírithe ar sonraí;
Go maith ag obair mar chuid d’fhoireann;
Scileanna maithe eagrúcháin agus ríomhaireachta;
Scileanna maithe cumarsáide agus idirphearsanta

Na huaireanta oibre ná a leanas:
Máirt – 11:00 go 14:30
Céadaoin – 11:00 go 14:30
Déardaoin – 11:00 go 14:00

Is féidir na huaireanta seo a bheith solúbtha don iarrathóir ceart.

Seol CV agus litir iarratais chuig cfdeise@gmail.com roimh 31/03/26. Beidh na hagallaimh ar siúl go luath i Mí Aibreán. Is féidir breis eolais a fháil tríd teagmháil a dhéanamh leis an mBainisteoir ar 083 445 5914.

Bainisteoir Forbartha

Scríofa ag Alex Hijmans ar 11 Márta 2026.

Tá Comhlucht Forbartha na nDéise ag lorg Bainisteoir Forbartha agus tá go dtí 31/03/26 chun cur isteach ar an bpost. Déan teagmháil le cfdeise@gmail.com le haghaidh sonraí iomlán an phoist a fháil agus chun CV agus litir iarratais a sheoladh isteach. Tuarastal €54,304. Beidh na hagallaimh ar siúl go luath in Aibreán.

Beidh an Bainisteoir Forbartha freagrach as Comhlucht Forbartha na nDéise (CFnaD) a bhainistiú agus clár forbartha pobail an Chomhluchta a chur i bhfeidhm.

Roinnt de na dualgais a bheidh le comhlíonadh ag an mBainisteoir Forbartha ná:

Stiúradh agus maoirseacht a dhéanamh ar an straitéis atá aontaithe ag CFnaD;
Comhairle a chuir ar Bhord CFnaD maidir le straitéis agus polasaí;
A bheith freagrach as buiséad CFnaD a riaradh agus cultúr éifeachtúil chostais a chothú;
Treoir agus ceannas a thabhairt d’fhostaithe CFnaD, agus a bheith mar Bhainisteoir Líne don Oifigeach Pleanála Teanga agus baill foirne eile;
Cinntiú go mbíonn tograí ag eascairt as an bPlean Teanga curtha i gcrích, de réir polasaithe CFnaD.

Oifigeach Feidhmiúcháin

Scríofa ag Alex Hijmans ar 11 Márta 2026.

TEIDEAL: Oifigeach Feidhmiúcháin
TUARASTAL: £33,542 (Beidh an té a cheapfar ag tosú ag pointe 1 de scála Grád EOI237)
TRÉIMHSE: Post lánaimseartha é seo agus gabhann tréimhse promhaidh sé (6) mhí leis.
Beidh an té a cheapfar sa phost seo lonnaithe i dTuaisceart Éireann

CEANNEAGRAÍOCHT uile-Éireann is ea An tOireachtas atá ag feidhmiú sa mhór-réimse “Deiseanna a thacaíonn le húsáid na Gaeilge agus bunú gréasán”. Dá réir sin, bíonn dualgais oibre ar gach ball foirne a bhaineann leis an dlínse ó thuaidh agus leis an dlínse ó dheas. Beidh an té a cheapfar mar OIFIGEACH FEIDHMIÚCHÁIN lárnach i gcur i gcrích Phlean Oibre na heagraíochta.

PRÍOMHFHREAGRACHTAÍ
• Clár Imeachtaí Uile-Oileáin an Oireachtais a chur chun cinn sa dá dhlínse agus rannpháirtíocht ann a spreagadh;
• Caidreamh idir gréasáin labhartha Gaeilge agus Ealaíne a éascú agus a chothú;
• Maoiniú/Urraíocht a aimsiú d’fheachtais agus d’imeachtaí an Oireachtais;
• Feidhmiú mar bhall de mheitheal meán sóisialta na heagraíochta;
• Ócáidí gréasánaíochta a reáchtáil don phobal úsáidte Gaeilge;
• Féilte agus tionscadail eile cultúir, ealaíne agus siamsa trí Ghaeilge a reáchtáil; agus
• Faisnéis i leith tinreamh ag imeachtaí an Oireachtais a bhailiú.
Is treoir ghinearálta atá luaite anseo agus ní gá gur cur síos iomlán é ar dhualgais uile an phoist.

TAITHÍ, SCILEANNA, EOLAS & CÁILÍOCHTAÍ RIACHTANACHA
• Ardchaighdeán labhartha agus scríofa i nGaeilge & i mBéarla;
• Taithí/Cumas imeachtaí a fhorbairt agus a bhainistiú;
• Eolas ar phobal na Gaeilge;
• Sárscileanna cur i láthair a bheith aige/aici;
• Ceadúnas tiomána glan.

INNIÚLACHTAÍ
• Ardleibhéal tionscnaimh, tuisceana, stuaime agus rúndachta;
• Cumas cruthaithe chun tascanna a phleanáil, a eagrú agus a sceidealú chun a chinntiú go gcuirtear i gcrích go héifeachtach iad agus chun spriocdhátaí a bhaint amach;
• Cumas oibriú as a stuaim féin agus mar chuid d’fhoireann agus chun freagracht a ghlacadh ar chlár oibre aontaithe.

PRÓISEAS IARRATAIS
CV agus litir/ráiteas pearsanta (i.e., nach mó ná 300 focal) ina dtugtar breac-chuntas ar an bhfáth a gcreideann tú go gcomhlíonann do scileanna, do thaithí agus do luachanna riachtanais an phoist seo.

Is fostóir comhionannas é An tOireachtas agus is í an Ghaeilge teanga oibre na Ceanneagraíochta.

Seol iarratas mar aon le CV, roimh 8 Aibreán 2026, chuig: poist@antoireachtas.ie

Faigheann Oireachtas na Gaeilge bunmhaoiniú ó Fhoras na Gaeilge

Poist Mhúinteoireachta Iar-Bhunoideachais

Scríofa ag Alex Hijmans ar 10 Márta 2026.

Tá Bord Oideachais agus Oiliúna na Gaillimhe agus Ros Comáin ag glacadh le hiarratais do na folúntais mhúinteoireachta seo a leanas a d’fhéadfadh teacht chun cinn don bhliain acadúil 2026/2027 laistigh de scoileanna T1 sa chás gurb í an Ghaeilge teanga na scoile i.e. scoileanna Gaeltachta, Gaelcholáistí agus aonaid Ghaeilge.

Liosta Scoileanna Oileáin Árann, Scoileanna Gaeltachta agus Gaelcholáistí laistigh de réimse feidhmiúcháin an GRETB.

* Coláiste Naomh Eoin Inis Meáin, Oileáin Árann

* Coláiste Ghobnait Inis Oírr, Oileáin Árann

* Coláiste Naomh Éinne Inis Mór, Oileáin Árann

* Coláiste na Coiribe Bóthar Bhaile na mBúrcach, Cnoc na Cathrach, Gaillimh

* Coláiste an Eachréidh Baile Átha an Rí, Co. na Gaillimhe

* Coláiste Cholmcille, Indreabhán, Co. na Gaillimhe

* Coláiste na bPiarsach Ros Muc, Co. na Gaillimhe

* Coláiste Naomh Feichín Corr na Móna, Co. na Gaillimhe

Teideal an Phoist: Múinteoir Iarbhunscoile

An Cineál Fostaíochta: Téarma Socraithe Pro Rata, Sainchuspóir lán-ama/páirtaimseartha.

Eagarthóirí i rannóg aistriúcháin CCEA (x3)

Scríofa ag Alex Hijmans ar 9 Márta 2026.

Tá áit lárnach ag CCEA i bpobal Thuaisceart Éireann. Tá sainchúram orainn an curaclam scoile a fhorbairt, cáilíochtaí a rialú agus scrúduithe agus measúnú a reáchtáil. Cuireann CCEA réimse de sheirbhísí tacaíochta ar fáil d’earnáil an Ghaeloideachais lena n-áirítear seirbhísí aistriúcháin agus eagarthóireachta maidir le scrúduithe agus curaclam.

Faoi láthair, tá CCEA ag iarraidh triúr (3) Ardoifigeach Feidhmiúcháin a cheapadh taobh istigh de sheirbhís aistriúcháin agus eagarthóireachta an Ghaeloideachais. Sna róil sin, tabharfaidh tú tacaíocht don Oifigeach Shinsearach Riaracháin leis an tsreabhadh oibre a chomhordú do scrúduithe CBAC (WJEC) agus CCEA araon agus le dearbhú cáilíochta a dhéanamh ar fhoireann d’aistritheoirí gairmiúla. Le go n-éireoidh leat, ní mór gur eagarthóir thú a bhfuil taithí agat agus beidh ort a bheith ábalta scileanna sármhaithe pleanála agus eagraithe a léiriú, chomh maith le scileanna éifeachtúla bainistithe ama, le tosaíochtaí casta atá in iomaíocht lena chéile a chur i gcrích. Ní mór duit taithí a bheith agat ar bheith ag obair i seirbhís aistriúcháin agus eagarthóireachta a bhíonn ag plé le teanga speisialaithe shofaisticiúil.

Tuilleadh eolais

Príomhoide

Scríofa ag Alex Hijmans ar 5 Márta 2026.

PRÍOMHOIDE

COLÁISTE NAOMH FEICHÍN, CORR NA MONA, CO. NA GAILLIMHE

CATAGÓIR V

Le bheith incháilithe le haghaidh ceaptha sa phost seo, ní mór d’iarrthóirí na riachtanais seo a leanas a shásamh:

Cáilíocht aitheanta múinteoireachta iar-bhunoideachais
Taithí shásúil cúig bliana (5) ar a laghad de mhúinteoireacht lánaimseartha
Clarú de réir Alt 30 den Acht um Chomhairle Mhúinteoireachta, 2001
Chomh maith le cáilíocht an Cheard-Teastais Gaeilge nó an TGMI nó an cháilíocht sa Ghaeilge de réir Chiorclán 21/00, eisithe ag an Roinn Oideachais agus Scileanna.

https://gretbcareers.thehirelab.com/LiveJobs/JobApply/8257?source=1
nó
www.gretb.ie/jobs

Comhordaitheoir Féilte agus Imeachtaí

Scríofa ag Alex Hijmans ar 4 Márta 2026.

Folúntas: Comhordaitheoir Féilte agus Imeachtaí

Beidh an comhordaitheoir ag obair i gcomhar leis an Chomhordaitheoir Ealaíon chun clár féilte agus imeachtaí a phleanáil agus a sheachadadh atá ar ardchaighdeán, atá spreagúil, atá nuálach agus a thugann ardán do na hEalaíona Gaeilge mar chuid de straitéis Ealaíon na Cultúrlainne.

Beidh sé de chúram acu fosta comhordú a dhéanamh ar mhargaíocht don chlár Féilte agus Ealaíona chomh maith le gníomhaíochtaí culturtha eile na heagraíochta.

Teideal an Phoist : Comhordaitheoir Féilte agus Imeachtaí
Freagrach do : Comhordaitheoir Ealaíon na Cultúrlainne
Conradh : Páirt-aimseartha
Suíomh : Cultúrlann Uí Chanáin, Doire
Uaireanta oibre : 30 uair
Tuarastal : £23,926

Tá an cuir síos poist ar fáil anseo: https://tinyurl.com/2ve6e4pn

Chun iarratas a dhéanamh, seol CV agus litir chlúdaigh (ag tabhairt faoi na critéir le do thoil) chuig: ryan@culturlann.org

Ní mór d’iarratais chomhlánaithe a bheith istigh faoin Aoine 20 Márta @ 3pm.

Stiúrthóir Seirbhísí Corparáideacha agus Gnóthaí Poiblí

Scríofa ag Sadhbh Ní Mhéalóid ar 24 Feabhra 2026.

Is mian le TG4 Stiúrthóir Seirbhísí Corparáideacha agus Gnóthaí Poiblí a earcú ar chonradh buan. Ag freagairt don Ard-Stiúrthóir, beidh an Stiúrthóir Seirbhísí Corparáideacha agus Gnóthaí Poiblí i bhfeighil gnóthaí corparáideacha lena n-áirítear ceannaireacht a thabhairt ar dhualgais rialachais chorparáidigh TG4, stiúradh a thabhairt ar acmhainní daonna maille le cúraimí gnóthaí poiblí na heagraíochta. Beidh an Stiúrthóir Seirbhísí Corparáideacha agus Gnóthaí Poiblí ina bhall d’fhoireann ardbhainistíochta TG4.

Tuilleadh eolais

Oifigeach Taibhealaíon Chonnacht

Scríofa ag Alex Hijmans ar 16 Feabhra 2026.

TEIDEAL: Oifigeach Taibhealaíon Chonnacht
GRÁD: Ardoifigeach Feidhmiúcháin
SCÁLA TUARASTAIL: €54,764 – €68,970 (Beidh an té a cheapfar ag tosú ag pointe 1 den scála)
RÉIGIÚN: Connacht
LÁTHAIR OIBRE: Ó chian / Oifig an Oireachtais, Páirc Ghnó Chasla, Casla, Co. na Gaillimhe.

AN FHÍS ‘Ealaíona Teangabhunaithe Gaeilge a bheith á gcleachtadh go saoithiúil, fonnmhar, lúcháireach, ag daoine den uile aoisghrúpa fud fad na tíre; go mbeidh rochtain ag gach cleachtóir ar chonair shealbhaithe agus forbartha na gcleachtas éagsúla d’fhonn iad féin a chur in iúl go cruthaitheach trí phriosma na n-ealaíon sin; agus go mbeidh léirithe á gcur ar fáil don phobal go rialta.’

RÁITEAS MISIN ‘Na hEalaíona Teangabhunaithe Gaeilge a cheiliúradh, a fhorbairt agus a chur chun cinn trí thacaíochtaí agus trí dheiseanna a chur ar fáil do dhaoine óga agus lánfhásta lena gcleachtas ealaíon pearsanta féin a fhorbairt; le bheith rannpháirteach i dtionscadail ealaíon pobail agus sainiúla; agus le pobal freastail leathan i dtaca leis na healaíona sin a chothú go réigiúnach agus go náisiúnta.’

PRÍOMHFHREAGRACHTAÍ

Clár Oibre aontaithe a chur i bhfeidhm i gCúige Chonnacht bunaithe ar an bPlean Gníomhaíochta Náisiúnta;
Cainéil Chumarsáide a bhunú le tacaíocht a thabhairt do chleachtóirí nua sna healaíona teangabhunaithe chomh maith leo siúd atá ag feidhmiú cheana féin, lena n-áirítear ach nach bhfuil teoranta de dhaoine aonair, d’eagraíochtaí ealaíon, d’eagraíochtaí pobail, de chumainn & de chompántais drámaíochta, bunscoileanna, iar-bhunscoileanna, institiúid ardoideachais, leabharlanna & ionaid ealaíon;
Cláir oiliúna ealaíon, tionóil agus féilte ar bhonn réigiúnach a eagrú;
Tionóil drámaíochta a reáchtáil a fheidhmeoidh mar áis oiliúna agus gréasánaíochta araon agus a bheidh dírithe ar chompántais drámaíochta nuabhunaithe/athbhunaithe;
Deiseanna agus tacaíochtaí chur ar fáil do chleachtóirí na n-ealaíon teangabhunaithe Gaeilge agus a bheith lánpháirteach i bhforbairt tacair uirlisí & acmhainní ar líne do na cleachtóirí sin;
Feasacht a ardú maidir le scéimeanna deontais & sparánachtaí na heagraíochta;
Comhpháirtíochtaí réigiúnacha a fhorbairt chun na healaíona teangabhunaithe Gaeilge a chur chun cinn agus deiseanna a chur ar fáil do chleachtóirí aonair, do ghrúpaí agus d’eagraíochtaí éagsúla chomh maith le pobal freastail a chothú do léirithe poiblí na n-ealaíon sin.
Is treoir ghinearálta atá luaite anseo agus ní gá gur cur síos iomlán é ar dhualgais uile an phoist.

TAITHÍ, SCILEANNA, EOLAS & CÁILÍOCHTAÍ RIACHTANACHA

Cáilíocht ealaíne aitheanta nó taithí oibre nach lú ná 3 bliana in earnáil na n-ealaíon;
Eolas ar chleachtais taibhealaíon éagsúla;
Ardchaighdeán i labhairt agus i scríobh na Gaeilge;
Sárscileanna pleanála, eagrúcháin agus cumarsáide;
Feasacht ar pholasaithe agus ar straitéisí um fhorbairt ealaíon teangabhunaithe;
Ceadúnas tiomána glan.

INNIÚLACHTAÍ

Scileanna ceannaireachta;
Cur chuige tionscnaíochta;
Scileanna Idirphearsanta agus Cumarsáide;
Bainistíocht agus Baint Amach Torthaí;
Saineolas, Oilteacht agus Féinfhorbairt;
Treallús & Tiomantas do chur chun cinn na dTaibhealaíon Teangabhunaithe Gaeilge.

Is fostóir comhionannas é An tOireachtas agus is í an Ghaeilge teanga oibre na Ceanneagraíochta.

Seol iarratas mar aon le CV, roimh 18 Márta 2026, chuig: poist@antoireachtas.ie