Iriseoir Ilmheán Nuachta agus Cúrsaí Reatha – Comhfhreagraí Chonnacht

Conradh 2 bhliain

Is craoltóir náisiúnta teilifíse Gaeilge é TG4 atá lonnaithe i mBaile na hAbhann, Co. na Gaillimhe. Tá ábhar TG4 ar fáil ar gach ardán teilifíse ar fud na hÉireann, ar fud an domhain ar an idirlíon agus ar ardáin dhigiteacha. Is craoltóir-foilsitheoir seirbhíse poiblí é TG4 a fhaigheann formhór a ábhair ó earnáil na léiritheoirí neamhspleácha, ábhar a bhfuil duaiseanna agus gradaim go leor buaite aige. Tá TG4 ag féachaint le hIriseoirí Ilmheán a earcú faoi láthair do sheirbhís dhigiteach nuachta.

Ag tuairisciú don Cheannaire Nuachta & Cúrsaí Reatha, agus ag obair go laethúil le hEagarthóir Nuachta, beidh na hiarrthóirí a n-éiríonn leo freagrach as scéalta nuachta digiteacha a chur ar fáil agus a léiriú. Beidh obair ar seal agus obair ag an deireadh seachtaine i gceist leis an bpost seo.

I measc na gcúraimí a bheidh i gceist, gan bheith teoranta dóibh, beidh;

• Scéalta nuachta a aimsiú agus a léiriú, idir scríobh, taifeadadh físe nó fuaime, ar ardchaighdeán d’ardáin dhigiteacha Nuacht agus Cúrsaí Reatha TG4.
• Scéalta nuachta a scríobh i nGaeilge agus a chur ar fáil don suíomh nuachta agus don Eagarthóir Nuachta.
• Moltaí a thabhairt agus a ghlacadh maidir le scéalta agus pleanáil chun cinn.
• Scéalta a chur i láthair ar cheamara nó mar ghearrthóga fuaime le béim ar an nuacht ghearrfhoirme do na meáin shóisialta.
• Cur chuige nuálaíoch a ghlacadh maidir leis na hardáin dhigiteacha agus na hardáin meán sóisialta agus suim a chur san iriseoireacht sa réimse seo.
• Aon dualgais bhailí eile a iarrann Bainisteoir, Stiúrthóir na Rannóige nó an tArd-Stiúrthóir ort a chomhlíonadh.

Iarrtar ar iarrthóirí CV, litir chlúdaigh agus físeán gearr fút féin agus roinnt samplaí de do chuid oibre do phost an Iriseora Ilmheán a sheoladh chuig cv@tg4.ie roimh 4pm Dé hAoine an 4 Meán Fómhair 2026.

Tuilleadh eolais anseo.