Féach thíos ar na feachtais mhóra atá ar siúl agus na heagraíochtaí atá taobh thiar dóibh. Is féidir teagmháil a dhéanamh leo chun a bheith páirteach iontu.
Obair Chonradh na Gaeilge #
Bíonn Conradh na Gaeilge chun tosaigh i bhfeachtais chun an Ghaeilge agus chun cearta teanga phobal na Gaeilge agus na Gaeltachta a chosaint agus a leathnú.
Bíonn idir chruinnithe le polaiteoirí, stáit seirbhísigh agus daoine ábhartha eile; stocaireacht; chomhfhreagras; cheisteanna parlaiminte; leasuithe á moladh ar reachtaíocht; aighneachtaí; thacaíocht páirtithe polaitiúla á lorg; thacaíocht á lorg ón bpobal; laethanta eolais do pholaiteoirí agus comhdhálacha á n-eagrú; agus eile ar bonn go leanúnach ag Conradh na Gaeilge chun na haidhmeanna abhcóideachta atá ag an eagraíocht a bhaint amach.
Feachtais an Chonartha
Féach ar shuíomh an Chonartha ar liosta A-Z ar a bhfeachtais, a bhaineann le hinfheistíocht sa bhreis sa Ghaeilge agus sa Ghaeltacht, le cúrsaí oideachais, tithíochta, agus toghcháin, le logainmneacha agus tuilleadh.
Na hAighneachtaí is déanaí
Déanann an Conradh aighneachtaí ar ábhair éagsúla i rith na bliana. Féach thíos ar roinnt cinn a chuireadh isteach le cúpla bliain anuas:
- Aighneacht Chonradh na Gaeilge don Chomhairliúchán Poiblí ar Mheasúnú Rioscaí Náisiúnta 2023
- Comhairliúchán: Dréacht-Pholasaí Eatramhach Gaeilge an Údaráis Oideachais
- Tuairim Chonradh na Gaeilge d’iarratas pleanála The Crescent Co. Ownership i gCnoc na Cathrach
- Aighneacht Comhairliúchán Poiblí maidir le Daonáireamh 2027
- Aighneacht Comhairliúchán ar Straitéis Litearthachta, Uimhearthachta agus Litearthachta Digití
- Aighneacht Chonradh na Gaeilge do Chomhairliúchán Poiblí ar an gcéad Chreat Beartais eile de chuid an Rialtais maidir le Rannpháirtíocht Leanaí agus Daoine Óga sa Chinnteoireacht
- Aighneacht maidir le hIarratas Pleanála Ballindooley Developments i Mionlach
An Dream Dearg #
Tháinig An Dream Dearg ar an fhód go luath in 2017 leis an fheachtas iomráiteach #AchtAnois a d’éiligh Acht Gaeilge ó thuaidh i ndiaidh bhlianta fada de leithcheal ar phobal na Gaeilge.
Ó shin i leith, tá fás as cuimse tagtha ar an ghrúpa agus iad aitheanta mar chrann taca do phobal na Gaeilge.
Feachtais an Dreama le Dearg
Díríonn an Dream ar fheachtais a bhaineann le sráidainmneacha, reachtaíocht teanga, an óige Gaeilge, an t-oideachas, comharthaíocht agus cearta teanga. Féach ar shuíomh an Dreama chun níos mó eolais a fháil.
TINTEÁN #
Is feachtas náisiúnta tithíochta TINTEÁN a bhfuil sé mar aidhm acu dul i ngleic leis an ngéarchéim tithíochta sna ceantair Ghaeltachta.
Tugann an feachtas seo, atá ina chomhiarracht ag Conradh na Gaeilge agus an grúpa feachtais BÁNÚ ó Ghaeltacht Chonamara, pobail Ghaeltachta fud fad na tíre le chéile chun aird a tharraingt ar na riachtanais phráinneacha tithíochta atá ag bagairt ar oidhreacht chultúrtha agus teanga na réigiún seo.
Eolas sa bhreis #
- Cén taighde atá á dhéanamh agus ar fáil faoin nGaeilge
