Glac páirt sa ghluaiseacht teanga le Conradh na Gaeilge.
Cur aithne ar Chonradh na Gaeilge #
Is é Conradh na Gaeilge fóram daonlathach phobal na Gaeilge agus saothraíonn an eagraíocht ar son phobal labhartha na Gaeilge agus na Gaeltachta ar fud na hÉireann uile agus timpeall na cruinne. Ó bunaíodh é ar 31 Iúil 1893, tá baill an Chonartha gníomhach ag cur chun cinn na Gaeilge i ngach gné de shaol na tíre, ó chúrsaí dlí agus oideachais go forbairt meán cumarsáide agus seirbhísí Gaeilge.
Tá breis agus 200 craobh agus is iomaí ball aonair ag Conradh na Gaeilge sa lá atá inniu ann, agus bíonn baill uile an Chonartha ag saothrú go dian díograiseach chun úsáid na Gaeilge a chur chun cinn ina gceantair féin. Músclaíonn an eagraíocht uile-oileánda seo pobal na hÉireann, tugann sí tuiscint úrnua dúinn ar ár n-oidhreacht uathúil agus teanga, agus cothaíonn sí meas ionainn ar an gcultúr Gaelach luachmhar atá againn.
Ráiteas Misin na hEagraíochta
Is é ráiteas misin an Chonartha ná ‘An Ghaeilge a athréimniú mar ghnáththeanga na hÉireann’.
Príomh-Réimsí Oibre
Seo blaiseadh de phríomhréimsí oibre an Chonartha; tabhairt cuairt ar a shuíomh chun níos mó eolais a fháil orthu.
- Abhcóideacht
- Oideachas
- Cumasú pobail
- Siamsaíocht / Féilte
- Ardú feasachta
- Ionadaíocht
Conas a bheith páirteach in obair an Chonartha #
Is í an bhallraíocht – idir bhaill chraoibhe agus bhaill aonair – croílár agus bunchloch na heagraíochta. Féach thíos ar eolas faoin mballraíocht agus cúpla feachtas eile:
- Aimsigh craobh i do cheantar
- Cláraigh mar bhall aonair den Chonradh
- Cláraigh craobh i do cheantar
- Cláraigh do rang nó scoil don Seó Bóthair
- Cláraigh le dúshlán Gaeilge 24
- Caith Fáinne le tacaíocht a léiriú
- Déan síntiús don Chonradh
Bíonn craobhacha ollscoile, de ghnáth a ghlacann ‘Cumann Gaelach’ nó ‘Cuallacht’ mar ainm, ag obair i gcoláistí agus ollscoileanna na tíre leis an nGaeilge a chur chun cinn agus pobail Ghaelacha a thógáil is a neartú ar a gcampais éagsúla.
