Deir Catherine Connolly go mbeadh comóradh céad bliain ar Choimisiún na Gaeltachta an bhliain seo chugainn ar cheann de na tionscnaimh mhóra a dtabharfaidh sí fúthu má thoghtar í ina huachtarán.
Tá Connolly i gCiarraí inniu mar chuid dá feachtas agus tionscnamh atá dírithe ar an nGaeilge, ‘Teanga na hÉireann’, le seoladh aici nuair a thabharfaidh sí cuairt ar an nDaingean i nGaeltacht Chorca Dhuibhne.
Dúirt Connolly arís go mbeadh an Ghaeilge “ina cuid lárnach dá hUachtaránacht”.
Má éiríonn léi an tÁras a bhaint amach, dúirt Connolly go mbeadh imeachtaí á reáchtáil ar feadh bliana, ó Mheitheamh 2026 go dtí Meitheamh 2027, ag comóradh céad bliain an choimisiúin a bhunaigh an Ghaeltacht i 1926.
Deir feachtas Connolly go dtabharfaidh an tionscnamh ómós do na pobail a chothaigh an Ghaeilge agus go ndéanfar ceiliúradh ar na glúnta nua atá tar éis í a thabhairt leo.
“Tá beocht sa nGaeilge arís – ní hamháin sna scoileanna agus i dtithe na Gaeltachta, ach i gcúrsaí ceoil, sna meáin agus i saol laethúil na tíre,” a dúirt Connolly agus tionchar TG4 agus Kneecap luaite aici.
“Mar Uachtarán, cinnteoidh mé go mbíonn fuinneamh nua agus an mhuinín seo sa teanga le fáil in Áras an Uachtaráin,” a dúirt sí.
