Tá beocht le mothú ar champas Ollscoil na Banríona i mBéal Feirste arís agus an chuid is mó de na mic léinn ag filleadh ar an chathair.
Ar ndóigh cuireadh fearadh na fáilte roimh lucht na chéad bhliana agus i mbliana tá beagnach 40 mac léinn nua ag déanamh staidéar ar an Ghaeilge san ollscoil.
Reáchtáladh ócáid sa QFT inné a thug deis do na mic léinn nua aithne a chur ar a chéile agus ar na léachtóirí agus cuireadh lón, cluichí agus eolas ar fáil.
Tá Éanna Nig Riabhaigh i measc mhuintir na chéad bhliana agus is i Scéim Chónaithe Ghaeilge Ollscoil na Banríona a bheidh sí ag cur fúithi. Tá sí ag dúil go mór le bualadh le cairde nua agus lena cuid Gaeilge a fhorbairt fríd an chúrsa agus sa saol sóisialta.
Labhair Meon Eile le Mark Harte, Oifigeach Tacaíochta Teanga in Ollscoil na Banríona chomh maith. Bíonn Mark ag tabhairt cuidiú agus comhairle do na mic léinn agus is comhartha iontach é go bhfuil líon na ndaoine a roghnaíonn an Ghaeilge ag ardú achan bhliain, dar leis.
