Tháinig 16 ball d’fhoireann tarrthála sléibhe Dhún na nGall amach ag an deireadh seachtaine le teacht i gcabhair ar shiúlaí sléibhe a shleamhnaigh ar an Earagail agus a ghortaigh a chos.
Cuireadh fios ar na seirbhísí éigeandála oíche Dé hAoine. Fuarthas suíomh an té a bhí gortaithe tríd an gcóras SARLOC, córas a ligeann do sheirbhísí éigeandála daoine a aimsiú trí chomhartha fóin, agus rinne an fhoireann ar an sliabh Gaeltachta. Bhí an duine tuairim is 550m os cionn leibhéal na farraige, 200m nó mar sin ó bharr an tsléibhe.
Bhí solas an lae ag imeacht a fhad is a bhí an fhoireann ag siúl suas an sliabh. Tháinig siad chomh fada leis an té a bhí gortaithe agus thug éadaí teolaí agus cúram garchabhrach dó. Bhí an aimsir go dona agus chuir sí isteach ar an radharc a bhí ag an bhfoireann ar an timpeallacht.
Seoladh an t-ingearán R118 ón Leathros i Sligeach ó thuaidh le cúnamh a thabhairt leis an tarrtháil. Chuir an drochaimsir isteach ar iarrachtaí chriú an aerárthaigh agus b’éigean dóibh filleadh ar a mbunáit i Sligeach.
Cuireadh an dara foireann tarrthála suas an sliabh ansin agus trealamh tarrthála ar iompar acu – sínteán, folústocht, agus cídeog theirmeach. Bhí drochaimsir cheart ann faoin am sin, agus b’éigean don dara foireann an trealamh a thabhairt trí bháisteach agus ceo, faoin dorchadas, chomh fada leis an té a bhí gortaithe.
Bhí an chéad fhoireann tar éis an duine a chur faoi bhothán éigeandála lena choinneáil sábháilte ón doineann. Cuireadh sa folústocht é agus é clúdaithe sa chideog theirmeach agus iompraíodh síos an sliabh ar an sínteán é. Turas beagán faoi bhun dhá chiliméadar a bhí ann ón áit ar shleamhnaigh sé go dtí an carrchlós, ó 550m go 220m.
Tugadh ar láimh sa charrchlós é don tSeirbhís Náisiúnta Otharcharr agus aistríodh chuig an otharlann é. D’fhág an t-otharcharr an carrchlós i nDún Lúiche go gairid i ndiaidh a haon a chlog ar maidin.
Bhí cúigear eile sa ghrúpa a bhí in éineacht leis an té a gortaíodh. Tháinig beirt anuas ón sliabh astu féin agus d’fhan triúr eile in éineacht leis go dtí gur thug baill Tharrtháil Sléibhe Dhún na nGall anuas iad siúd freisin.
“Meabhrú atá san eachtra seo gur féidir leis na cúinsí sléibhe athrú go tapa ag an tráth seo bliana. Is féidir le botún beag siúlóid dheas lae a iompú ina éigeandáil thromchúiseach. Bígí ullamh: tugaigí libh éadaí breise agus lampa cinn, agus cinntígí go bhfuil an fón luchtaithe, agus casaigí siar má théann an aimsir in olcas. Guímid gach rath ar an té a gortaíodh agus go dtaga biseach luath air,” a dúradh i ráiteas a d’eisigh Tarrtháil Sléibhe Dhún na nGall.
