D’fhág teaspach na míosa seo caite gur úsáideadh an méid is mó grianfhuinnimh riamh in Éirinn in aon mhí amháin, dar le hEirGrid.
Léirigh réamhshonraí nua ó EirGrid, forbróir eangach leictreachais na hÉireann, gurb í mí Iúil an mhí ba mhó riamh i ndáil le líon an ghrianfhuinnimh a bhí ag tabhairt cumhachta don chóras leictreachais, agus gur chuir grianfhuinneamh ar scála na heangaí 9.4% leis an meascán breosla iomlán don mhí.
Ardú é sin ón 8.2% i mí an Mheithimh agus 7.8% in mí Bealtaine.
Níl ach fuinneamh a ghin feirmeacha gréine tráchtála san áireamh sna figiúirí sin. Ní áirítear aon chumhacht a ghin painéil ghréine ar thithe cónaithe agus a díoladh ar ais leis an eangach chumhachta.
Mar sin féin, bhí an méid cumhachta a tháinig ó fhoinsí in-athnuaite níos ísle an mhí seo caite ná mar a bhí anuraidh. Deir EirGrid gur tháinig 32% den leictreachas a úsáideadh i mí Iúil ó fhoinsí in-athnuaite, i gcomparáid le 33% sa mhí chéanna anuraidh.
Fuinneamh gaoithe ab ea 22% den fhuinneamh a gineadh an mhí seo caite, laghdú ó 24% an bhliain roimhe. Thit an soláthar ó fhoinsí in-athnuaite eile ó os cionn 2% in 2025 go dtí 0.5% i mbliana.
Gás an fhoinse ba mhó a úsáideadh chun leictreachas a ghiniúint sa stát an mhí seo caite agus 43% den soláthar ag teacht ó ghiniúint gáis.
Iompórtáladh 24% den soláthar cumhachta an mhí seo caite, méadú ó 15% i mí Iúil 2025.
Bhí an t-éileamh foriomlán ar an gcóras leictreachais ag 2,744 GWh i mí Iúil, i gcomparáid le 2,676 GWh i mí an Mheithimh.
