COLÁISTÍ SAMHRAIDH: Ardú eile fógartha ar an liúntas a íoctar le mná tí na Gaeltachta

Tá ardú eile ar an liúntas a íoctar le teaghlaigh a chuireann lóistín ar fáil do lucht freastail na gcoláistí Gaeilge fógartha ag Aire na Gaeltachta.

Tiocfaidh ardú €1.50 an scoláire i bhfeidhm ag deireadh na míosa agus €16 in aghaidh an dalta in aghaidh na hoíche le híoc le mná agus fir tí na Gaeltachta as lóistín a chur ar fáil faoi Scéim na bhFoghlaimeoirí Gaeilge.

Fógraíodh ardú €1.50 eile in 2025 agus is é seo an cúigiú huair don rialtas an liúntas a mhéadú le blianta beaga anuas. €10 in aghaidh na hoíche a bhí sa liúntas in 2022.

“Is cúis mhór áthais dom an t-ardú seo a fhógairt don scéim is sine atá á riar ag mo Roinn, Scéim na bhFoghlaimeoirí Gaeilge,” a dúirt an tAire Dara Calleary agus an scéal á fhógairt ar maidin.

“Tá aitheantas tuillte ag na teaghlaigh a chuireann lóistín ar fáil mar aon leis na coláistí as an acmhainn luachmhar a chuireann siad ar fáil do lucht freastail na gcúrsaí Gaeilge.

“Tá mé lánchinnte go gcuideoidh an t-ardú ar thacaíocht mo Roinne leis an gcostas a bhaineann le lóistín a sholáthar agus chun tuilleadh teaghlaigh a mhealladh le go dtiocfadh fás agus forbairt ar an earnáil thábhachtach seo sna blianta amach romhainn.”

Beidh an t-ardú ag dul do na brúnna agus coláistí cónaithe a chuireann lóistín ar fáil faoin scéim chomh maith. €12 in aghaidh an dalta in aghaidh na hoíche a gheobhaidh siadsan.

Cuirfear na rátaí nua i bhfeidhm ón 30 Bealtaine 2025, tús na gcúrsaí samhraidh i mbliana. Deir Roinn na Gaeltachta go mbainfidh os cionn 530 teaghlach sa nGaeltacht leas as an ardú nua.

Chomh maith leis na harduithe seo, tá ardú ar an bhfóirdheontas a íoctar faoi dhá scéim eile de chuid na Roinne, Scéim Oileánda (ÁRAINN) Gaeltachta faoina dtugtar deis do scoláirí scoilbhliain iomlán a chaitheamh ar cheann de thrí oileán Árann agus an Scéim ERASMUS Gaeltachta faoina dtugtar deis do mhic léinn tríú leibhéil seimeastar a chaitheamh sa Ghaeltacht.