Tá sé deimhnithe ag an gCoimisinéir Gaeilge ó thuaidh go bhfuil iarrtha ag an mbreitheamh atá ag plé leis an gcás cúirte faoin gcomharthaíocht dhátheangach i Mórstáisiún Bhéal Feirste air páirt a ghlacadh sa gcás.
Tá dúshlán cúirte tugtha an gníomhaí aontachtach Jamie Bryson agus an tAire Pobal de chuid an DUP, Gordon Lyons, in aghaidh an chinnidh a rinne an tAire Bonneagair, Liz Kimmins, Sinn Féin, níos luaithe i mbliana go gcuirfí comharthaíocht Ghaeilge in airde sa stáisiún nua.
I mí Mheán Fómhair, mhol an breitheamh Ard-Chúirte atá ag éisteacht an cháis go lorgódh na hairí comhairle an Choimisinéara Gaeilge nua, ach is léir go bhfuil an teagmháil dhíreach déanta ag an mbreitheamh leis an gcoimisinéir ó shin.
In agallamh le Tuairisc, dúirt an Coimisinéir Gaeilge Pól Deeds go raibh an Breitheamh Gerry McAlinden tar éis scríobh chuige ag iarraidh air baint a bheith aige leis an gcás.
“Ní dhearna mé iarracht ar bith dul isteach sa chás ach, sin ráite, bhí an breitheamh féin, an Breitheamh McAlinden atá ag stiúradh an cháis, ag caint faoi mé a thabhairt isteach agus bhí an chuma air go raibh sé chun iarracht a dhéanamh na hairí féin a threorú chugam. Anois tá sé i ndiaidh scríobh chugam ag iarraidh orm teacht isteach,” a dúirt an Coimisinéir in agallamh le Póilín Ní Chiaráin ar An Pod Gaeilge.
Dúirt Deeds go raibh sé á mhaíomh ag daoine áirithe, polaiteoirí ina measc, go raibh sé ag iarraidh “a ladar a chur isteach” sa scéal roimhe seo ach níor ghlac sé leis sin.
“Sa Tionól [Dé Céadaoin], bhí duine ón TUV ag rá go raibh mé féin ag iarraidh teacht isteach, “intervene” an focal a d’úsáid sé, rud a bhí bréagach ar fad.
“Ní raibh mé ag iarraidh teacht isteach sa chás seo. Dúirt mé go gcuirfinn comhairle ar fáil mar chuid den ról atá agam ach níor dhúirt mé go raibh mé ag iarraidh teacht isteach, ní dhearna mé iarracht teacht isteach.”
Dúirt Deeds go raibh ceist ann go fóill maidir le cén ról go díreach a bheadh aige sa chás. Tá an Coimisinéir Gaeilge fós ag fanacht ar ordú um thosach feidhme chun go mbeadh sé in ann comhairle, tacaíocht agus treoir a thabhairt d’eagraíochtaí poiblí faoi úsáid na Gaeilge, ach mheas sé go mbeadh sé fós in ann a “thuairim phroifisiúnta” a thabhairt don bhreitheamh mura mbeadh an t-ordú sin tugtha faoin am go n-éistfí an cás.
Dúirt Deeds “nár oscail” sé “a bhéal go fóill” faoin gcás féin. Dúirt sé in agallamh a rinne sé ó thosaigh sé sa ról an mhí seo caite go mbeadh sé ag moladh go mbeadh comharthaíocht Ghaeilge le feiceáil i Mórstáisiún Bhéal Feirste agus gur mheas sé nach “go rómhaith” a dhéileáil Feidhmeannas Thuaisceart Éireann leis an scéal.
Is léir go n-aontaíonn an Breitheamh McAlinden leis an méid sin. Nuair a chuir sé siar an cás siar dúirt an breitheamh go raibh conspóid na gcomharthaí tar éis “ceap magaidh” a dhéanamh den Fheidhmeannas.
Tá Jamie Bryson agus an tAire Gordon Lyons ag maíomh gur chóir cead a bheith faighte ag an Aire Liz Kimmins ón bhFeidhmeannas sula ndearna sí an cinneadh go gcuirfí an chomharthaíocht Ghaeilge in airde sa stáisiún.
