Chun críoch a chur lenár sraith ‘Liosta Léitheoireachta na Nollag’, bhuail Meon Eile le Pádraig Ó Tiarnaigh le tuilleadh a fháil amach faoina leabhar úrnua, ’Cloch in Áit an Charnáin’.
Is leabhar é atá foilsithe ag Éabhlóid agus a dhíríonn ar shaol agus ar shaothar an bhailitheora béaloidis as Dún na nGall, Seán Ó hEochaidh.
Thaistil Ó hEochaidh timpeall Ghaeltacht Thír Chonaill, ag bailiú scéalta, amhrán agus béaloidis a bhí curtha ar aghaidh ó ghlúin go glúin leis na céadta bliain. Tá dúspéis ag Pádraig san ábhar le fada agus bhí sé ag iarraidh saibhreas agus tábhacht na hoibre a roinnt leis an phobal mór.
Tugann sé léargas cruinn dúinn ar oidhreacht an bhailitheora agus fosta ar an saol a bhí ag an fhear féin agus an caidreamh a bhí aige lena fhostóir, Coimisiún Béaloideasa Éireann, agus lena cheannasaí, an stiúrthóir Séamus Ó Duilearga.
Tá neart le foghlaim ón scéal suimiúil seo i gcomhthéacs na todhchaí, ionas go dtuigfidh Gaeil an lae inniu an tábhacht a bhaineann lenár n-oidhreacht agus lenár saibhreas cultúir a bhailiú agus a chaomhnú do na glúnta amach romhainn. Is cinnte gur leabhar luachmhar spreagúil é seo do scoláirí, amhránaithe, acadóirí agus do dhuine ar bith a bhfuil spéis acu i scéal cumhachtach lán croí agus carachtar.
Is féidir Cloch in Áit an Charnáin a cheannach ó An Ceathrú Póilí anseo.
