Scoláireachtaí d’amhránaithe na Gaeltachta chun freastal ar NASC 2026
(Grianghraf le AB Cassidy Photography)
Beidh líon teoranta scoláireachtaí ar fáil d’amhránaithe atá lonnaithe sa Ghaeltacht agus a chanann i nGaeilge mar chuid de scéim atá fógartha ag Ealaín na Gaeltachta agus Comhdháil Amhránaíochta an Atlantaigh Thuaidh (NASC).
Tá trí scoláireacht ar fáil ar luach €1,000 an ceann chun íoc as costais chlárúcháin, costais taistil, lóistín agus liúntais laethúla do na hiarrthóirí le linn na féile ó 6—8 Márta 2026 i nDún Éideann, Albain.
Bunaíodh Ealaín na Gaeltachta in 1997 mar thoradh ar chomhpháirtíocht idir Údarás na Gaeltachta agus An Chomhairle Ealaíon. Forbairt na n-ealaíon dúchasach agus comhaimseartha sa Ghaeltacht atá mar aidhm ag Ealaín na Gaeltachta agus dá réir sin soláthraíonn siad seirbhísí agus scéimeanna deontais a thacaíonn le heagraíochtaí ealaíon agus le healaíontóirí aonair. Cuireann Ealaín na Gaeltachta oiliúint agus meantóireacht ar fáil agus tacaíonn le tionscnaimh a chuireann le agus a neartaíonn cumas agus infreastruchtúr na n-ealaíon sa Ghaeltacht.
Ócáid trí lá í Comhdháil Amhránaíochta an Atlantaigh Thuaidh a dhéanann ceiliúradh ar an amhránaíocht thraidisiúnta agus ar cheol dúchais an Atlantaigh Thuaidh.
Deir Stiúrthóir NASC, Brian Ó hEadhra, faoin Chomhdháil, “Cibé an t-amhránaí aitheanta thú, taighdeoir ar an traidisiún béil, ceannaire amhránaíochta pobail, nó duine a bhfuil grá aige do na hamhráin thraidisiúnta, cuireann NASC spás fíoroscailte ar fáil ina bhfuil gach guth luachmhar.”
Clár traschultúrtha a bhíonn i gceist le NASC ina mbeidh idir cheolchoirmeacha, cheardlanna, phléphainéil, agus chiorcail bheaga amhránaíochta ar siúl. Deir an Chomhdháil go dtabharfaidh na himeachtaí amhránaithe, ceoltóirí, taighdeoirí, agus lucht spéise ó gach cearn de réigiún an Atlantaigh Thuaidh agus níos faide i gcéin le chéile.
Glacfar le hiarratais ar na scoláireachtaí do dhaoine aonair atá 18 mbliana d’aois nó níos sine go dtí an 21 Samhain. Is féidir tuilleadh eolais maidir leis an phróiseas iarratais a fháil anseo.
The post Scoláireachtaí d’amhránaithe na Gaeltachta chun freastal ar NASC 2026 appeared first on NÓS.
