Rianta na Míosa – Deireadh Fómhair 2025
Tá scoth an cheoil úir idir Éireannach agus eachtrannach le haimsiú i measc na rianta atá curtha le seinnliosta Spotify NÓS agam le mí anuas, gan trácht ar shlám seod atheisithe.
Bíodh do chluasa ar bior agat do leagan Huartan den amhrán traidisiúnta ‘Cad É Sin’, leagan Lankum de ‘Ghost Town’ The Specials, traiceanna ó albaim úra Olan Monk as Conamara agus Just Mustard Dhún Dealgan agus singil úr frith-fhaisisteach Lisa O’ Neill.
Tá an chéad singil atá eisithe ag Lone le stáir le clos chomh maith le hathmheascadh eipiciúil anamúil déanta ag Joe Claussell ar an bport house ‘Save Your Soul’ de chuid Arp Frique agus The Perpetual Singers. Má tá fonn rince fós ort tar éis sin a chlos, fan sa diallait do rianta úra ó leithéidí Medlar, Quartz, Jessy Lanza, Jason Code agus Nubiyan Twist.
Tá ceol dioscó Puinseábach againn athmheasctha ag Peaking Lights, singil croíúil dar teideal ‘When Palestine Is Free’ ó Momoko Gill, agus ceol úr ó Boroco agus Maher Green as Béiriút bainte ón gcnuasach Fake Lines a d’eisigh an lipéad Sono Levant le déanaí ar mhaithe le hairgead a chruinniú ar son mhuintir Gaza.
An méid sin ar fad agus ceol ó albaim atá eisithe le déanaí ag Aoife O’ Brien agus Cormac McCarthy, an tríréad snagcheoil spleodrach Joanna Duda Trio, Jennifer Walton agus an pianadóir Vanessa Wagner, singil reigé úr ó Elijah Minelli & Dennis Bovell agus fuaimeanna atheisithe ó Los Z 66 na Spáinne, ó Gasper Lawal na Nigéire, Moodymann as Detroit agus ó Ramon Morris.
Ná caill an banger seo ó Róis agus hhH (ceann nach n-aimseoidh tú ar Spotify)…
Did ye ever get The Ride at The Wake House? by RÓIS x hhH
…agus an ceann seo ó Rory Sweeney, Ushmush agus Roo Honeychild bainte ó albam úrnua Sweeney, Old Earth.
The post Rianta na Míosa – Deireadh Fómhair 2025 appeared first on NÓS.
