Gradaim Spiorad Chill Dara 2026 le bronnadh ag Féile Bhríde – Spiorad Chill Dara 2026
(Tony Shanahan, Comhairle Contae Chill Dara, Sonya Kavanagh, Príomhfheidhmeannach, Comhairle Contae Chill Dara agus an Comhairleoir Carmel Kelly, Cathaoirleach ag Áras Chill Dara, An Nás. Grianghraf le hAishling Conway)
Tá fógartha ag Comhairle Contae Chill Dara agus Féile Bhríde – Spiorad Chill Dara 2026 gur seoladh Gradaim Spiorad Chill Dara 2026 den chéad uair inniu. Is tionscnamh nua é seo a dhéanfaidh ceiliúradh ar dhaoine aonair agus ar na grúpaí “a chuimsíonn luachanna Bhríde tríd an méid a chuireann siad le saol an phobail ar fud Chill Dara.”
Mar chuid den fhéile agus de na gradaim, cuirfear béim ar dhaoine agus ar eagraíochtaí a ndearna a ngníomhartha agus a gcruthaitheacht difríocht shuntasach do dhaoine eile sa chontae. Bronnfar Gradam Saoil mar chuid den tsearmanas, gradam a thugann aitheantas do dhuine nó do ghrúpa a chuidigh le Cill Dara a chur ar an stáitse náisiúnta nó idirnáisiúnta.
Aithneoidh Gradaim Spiorad Chill Dara 2026 ionchur na n-ainmnithe thar réimse leathan catagóirí, mar atá:
- Oidhreacht Áitiúil agus Bithéagsúlacht
- Ranníocaíocht leis an Saol Pobail áitiúil
- Ranníocaíocht Óige
- Gradam Comhshaoil
- Ranníocíocht leis na hEalaíona
- Gradam Gnóthachtála Spóirt
- Bean sa Cheannaireacht
Ag labhairt di faoin tseoladh, dúirt Príomhfheidhmeannach Chomhairle Contae Chill Dara, Sonya Kavanagh, “Ba mhaith linn an deis seo a thapú chun aitheantas a thabhairt d’obair chrua agus do dhíograis bhaill ár bpobail. Gach lá ar fud ár gcontae, tugann daoine aonair agus grúpaí a gcuid ama, scileanna agus paisean chun feabhas a chur ar shaol daoine eile. Tá na gradaim seo dírithe ar an tiomantas sin a léiriú agus ar an spiorad pobail dochreidte a shainmhíníonn Spiorad Chill Dara a cheiliúradh.”
Chuir an Cathaoirleach, an Comhairleoir Carmel Kelly, fáilte roimh an tionscnamh nua seo. Is é a dúirt sí, “Ag glacadh le Spiorad Chill Dara, is iad na gradaim seo ár mbealach chun ceiliúradh a dhéanamh ar luachanna a bhaineann le Bríde atá chomh fiúntach sa lá atá inniu ann agus a bhí siad 1500 bliain ó shin, amhail comhbhá, inspioráid, comhionannas agus inbhuanaitheacht. Molaim do gach duine páirt a ghlacadh agus cabhrú linn onóir a thabhairt dóibh siúd a dhéanann níos mó ná mar is gnách chun difríocht a dhéanamh, ag léiriú fíorspiorad Chill Dara.”
Is féidir duine aonair nó grúpa a ainmniú ón lá inniu, an 5 Samhain 2025, go dtí 17:00 an 4 Nollaig 2025 anseo. Déanfaidh painéal moltóireachta neamhspleách cinntí faoi na hiontrálacha go léir agus fógrófar gearrliosta roimh thús na féile. Bronnfar na Gradaim ag searmanas speisialta i gCruinniú Chill Dara, an Nás mar chuid d’Fhéile Bhríde – Spiorad Chill Dara.
Thig tuilleadh sonraí a fháil ar Fhéile Bhríde – Spiorad Chill Dara 2026 agus ar Ghradaim Spiorad Chill Dara 2026 anseo.
The post Gradaim Spiorad Chill Dara 2026 le bronnadh ag Féile Bhríde – Spiorad Chill Dara 2026 appeared first on NÓS.
