Tá an Garda Síochána fós i mbun fiosruithe maidir le bás mná i gConamara Dé hAoine seo caite.
Aimsíodh corp Philomena Hernon i dteach cónaithe i Sáile Chuanna taobh thiar den Spidéal tráthnóna Dé hAoine.
Rinneadh scrúdú iarbháis ar a corp ag an deireadh seachtaine ach níl na torthaí fógartha ag na Gardaí agus an fiosrúcháin fós ar bun.
Tá na Gardaí ag iarraidh fáil amach an timpiste thragóideach a bhí sa mbás nó an raibh cúis eile i gceist.
Baintreach sna seascaidí ab ea Philomena Hernon agus bhí triúr clainne aici. Is é an t-iarFheisire Eorpach, Seán Ó Neachtain a deartháir.
Agus é ag labhairt leis an Sunday Independent, dúirt Ó Neachtain gur chreid sé gur timpiste a bhí i mbás a dheirféar agus go ngoilleann na ceisteanna atá ann faoina bás go mór ar a muintir.
Aimsíodh corp Philomena Hernon gar do bhun staighre sa teach agus tá na Gardaí ag fiosrú an é gur thit sí. Meastar go bhféadfadh sé gur bhásaigh sí roinnt uaireanta an chloig sular aimsíodh a corp agus sular cuireadh fios ar na Gardaí agus ar na seirbhísí éigeandála.
Gabhadh fear sna daichidí ag an láthair ach níor bhain a ghabháil le bás Phiilomena Hernon. Líomhnaítear go ndearna an fear a tógadh bagairtí ar na paraimhíochaineoirí a tháinig ag an teach agus gurbh éigean do na Gardaí é a cheansú sular gabhadh é.
