SPLANC i mBaile Átha Cliath 7 ón chraobh is nua ar an bhloc
Tá féile ealaíon nua dar teideal SPLANC á reáchtáil an mhí seo i mBaile Átha Cliath 7 ag craobh nua de chuid Chonradh na Gaeilge, is é sin Craobh BÁC 7. Bunaíodh an chraobh nua seo ar na mallaibh d’fhonn na healaíona áitiúla Gaeilge a cheiliúradh agus a chur chun cinn ar fud an cheantair lógánta.
Seolfar an fhéile ar an Aoine 24 Deireadh Fómhair ag céilí mór i dteach tábhairne McGowan’s i mBaile Phib. Deis is ea seo do dhaoine a scileanna céilí a chleachtadh agus damhsaí céilí nua a fhoghlaim ag an imeacht. Beidh scoth na gceoltóirí áitiúla ann ag bualadh cúpla port chun cur leis an oíche agus an ceol traidisiúnta á cheiliúradh acu.
Tráthnóna Sathairn beidh an t-ealaíontóir áitiúil Fiona Harrington ag éascú ceardlann ealaíne do pháistí i nGaelscoil Bharra. Tá blianta de thaithí ag Fiona sna hamharc-ealaíona agus sa lásadóireacht agus beidh sise ag teagasc na scileanna seo d’aos óg na háite i gceardlann teicstílí le holann, éadach, snáth agus snáithín. Féadfaidh na páistí a gcarachtair, a n-ainmhithe, nó a n-eachtráin féin a chruthú sa cheardlann. Is é an aidhm atá ag an cheardlann ná na healaíona dúchasacha atá sa cheantar a chur chun cinn.
Oíche Shathairn líonfar láthair stairiúil an chumainn peile, Na Boihéimigh, Dalymount ar oíche Shathairn le haghaidh réabh mór millteach. Beidh na DJanna óga is fearr tír ag casadh na ndioscanna agus ag sólathar ceol leictreach ar an oíche. Thairis sin beidh an comharghrúpa ceoil Craobh 1916 ag seinm ceol traidisiúnta do na sluaite. Táthar ag súil le breis agus 300 duine ag an imaecht.
Tá roinnt mhaith ar siúl ar lá deiridh na féile freisin idir ceardlann damhsa seit agus Éigse Bhaile Átha Cliath. Beidh an rinceoir is múinteoir rince mór le rá Bláthnaid Ní Smaoinigh ar stiúir na ceardlainne rince in The Hut i mBaile Phib ag 16:00. Ceardlann agus imeacht idirghníomhach é a thabharfaidh léargas ar stair rince na hÉireann do na daoine a bheidh i láthair.
Ag 17:00 reáchtálfar Éigse Bhaile Átha Cliath 7 thuas staighre in The Hut. Déanfaidh an t-imeacht seo ceiliúradh ar sheantraidisiún na héigse in Éirinn trí fhilí óga áitiúla a thabhairt chun stáitse lena saothar a rá agus a bpróiseas cruthaitheachta a phlé. I measc na bhfilí a bheidh ann tá Cúán de Búrca, Roxanna Nic Liam, Eoin P. Ó Murchú, Cormac Mac Gearailt, agus Aoife Mairéad Ní Dhonncha. Beidh an seanchaí is gearrscéalaí Stiofán Ó Briain ó Aerach Aiteach Gaelach ag plé a phróisis scríbhneoireachta féin agus gearrscéalta dá chuid á léamh aige.
Cuirfidh Amhránaithe an Chlub clabhsúr ar SPLANC ar an 26 Deireadh Fómhair. Bunaíodh an comharghrúpa in 2021 chun daoine a spreagadh ceol a chasadh i suíomh sóisialta. Chomh maith leis na poirt a bhuailfidh Amhránaithe an Chlub, beidh deis ag amhránaithe eile atá i láthair a n-amhrán féin a roinnt.
Beidh SPLANC ar siúl ón 24–26 Deireadh Fómhair. Is féidir teacht ar an chlár agus ar mheáin shóisialta na craoibhe anseo.
The post SPLANC i mBaile Átha Cliath 7 ón chraobh is nua ar an bhloc appeared first on NÓS.
