‘Neacha Scáfara’: an áis nua foghlama le Gaeloideachas
Gach lá roimh Oíche Shamhna an mhí, ag coim na hoíche, tá ábhar nua foghlama á fhoilsiú ag Gaeloideachas faoi na “neacha scáfara” a phléitear i mbéaloideas na hÉireann. Togra é seo de chuid Thonaí Uí Rodhuibh, Oifigeach Forbartha le Gaeloideachas.
Sraith de bhileoga eolais é an togra seo ina ndíríonn gach bileog ar neach éigin ón bhéaloideas, agus orthu siúd a bhfuil baint acu le hOíche Shamhna (nó leis na rudaí scanrúla) go háirithe. Tagann gach bileog le pictiúr is féidir a dhathú den neach atá á phlé. Leis, tá giota eolais a chuireann síos ar an phictiúr agus cá háit as a dtagann an neach.
Anuas air sin, tagann gach bileog le comhad fuaime agus breis eolais faoin neach le cluinstin ann. Léiríonn an comhad foghraíocht na bhfocal agus cuireann sé leis an atmaisféar scáfar scanrúil go mór mór.
I measc na neach atá le feiceáil agus le cluinstin, tá leithéid ‘Bean Sí’, ‘Deamhan’, ‘Súmaire’, ‘Aosán’ agus roinnt mhaith eile.
Bíonn an-tóir ar ábhar Gaeilge d’Oíche Shamhna i mbunscoileanna agus i meánscoileanna. Tugann an acmhainn seo áiseanna iontacha ar fáil do dhaltaí scoile a bheith ag foghlaim faoin bhéaloideas agus faoin stair atá thart timpeall orthu ar fad. Cad iad na neacha eile atá le teacht roimh an oíche mhór…?
Thig teacht ar na hacmhainní ar fad atá foilsithe go dtí seo ar an tsuíomh gréasáin seo.
The post ‘Neacha Scáfara’: an áis nua foghlama le Gaeloideachas appeared first on NÓS.
