Duais an Úrscéil bronnta ar ‘An Cláirseoir’ le Diarmuid Johnson ag Oireachtas 2025
Bronnadh duais an úrscéil in Oireachtas na Gaeilge 2025 ar An Cláirseoir le Diarmuid Johnson inniu an 29 Deireadh Fómhair. Úrscéal staire faoi ionradh na Normannach ar Éirinn in 1169 atá sa saothar. Tá léargas ann ar gach ba chúis leis an ionradh mór úd a d’fhág a lorg go buan ar scéal na tíre.
Ag labhairt dó le NÓS, dúirt an t-údar gur mór an phribhléid dó An Cláirseoir a bheith roghnaithe ag na moltóirí i mbliana nó is cinnte “go raibh iomaíocht ghéar ann agus caighdeán ard sna hiarrachtaí eile ar fad.”
“Bronnadh Gradam Uí Shúilleabháin ar Conaire Mór in 2017, agus Gradam Leabhar Gaeilge na Bliana An Post ar Tuatha Dé Danann an bhliain dár gcionn,” arsa fear na Gaillimhe, “ach seo é an sméar mullaigh ar na gradaim sin.”
D’fhiafraigh muid de cén tábhacht dar leis atá leis an aitheantas atá á thabhairt do An Cláirseoir, is é a dúirt sé, “Is ag cíoradh thionchar na hiasachta ar stair na hÉireann a bhímse i mo shaothar próis agus tá súil agam go rachaidh An Cláirseoir chun sochair agus chun siamsa do lucht léite na Gaeilge de bhrí an aitheantais seo.”
I measc na mbuaiteoirí eile, thug ‘Stáisiún Chaiseal na gCorr’ le Jack Ó Maoláine an duais ‘Iriseoireacht faoi 18’ abhaile, bronnadh an duais ‘Ficsean faoi 18’ ar Torin Ó Baoighill as An Meaisín Díola, agus bhuaigh Sophie Nic Giolla Phádraig an Comórtas Filíochta do Mhic Léinn Fochéime don phíosa ‘Áilleacht Mhiotaseolaíochta’.
Beidh tuilleadh uasdátuithe le teacht ó NÓS ar Ghradaim Chumarsáide an Oireachtais anocht an 29 Deireadh Fómhair ó Halla na Cathrach. Thig uasdátuithe beo a fheiceáil ar chuntas Instagram NÓS, agus cluinfear ó bhuaiteoirí Bhuaic-Ghradam an Oireachtais fosta.
Tá An Cláirseoir á chur i gcló faoi láthair, agus á fhoilsiú ag Leabhar Breac i rith na míosa. Go maire an scríbhneoir a nuaíocht!
The post Duais an Úrscéil bronnta ar ‘An Cláirseoir’ le Diarmuid Johnson ag Oireachtas 2025 appeared first on NÓS.
