Podchodl-Podchraoladh nua ar an Neamhchodladh le hAodhán Ó Baoill
Eisíodh podchraoladh nua inniu atá ag tabhairt faoi shaincheist atá ag ciapadh na milliún daoine agus atá chomh sean le heipicí na Measpatáime. Is é an fhadhb sin an codladh… nó an easpa codlata sa chás seo.
Codladh Sámh is teideal don tsraith nua 10 gclár atá léirithe ag Macha Media agus curtha i láthair ag Aodhán Ó Baoill. Tá tograí eile léirithe ag Macha Media amhail Fuaim na hAbhann agus Le Chéile ar RTÉ. Tá cleachtadh maith ag Aodhán fosta ar chúrsaí craoltóireachta agus sraith raidió déanta aige ina gclúdaíonn sé na hocht gceathrú (is ea — 8!) i mBéal Feirste le Niamh Ní Dhubhgáin.
Bhí fadhbanna codlata riamh ag Aodhán agus is iomaí oíche fós a bhíonn sé ina shuí go mall ag stánadh ar cheithre bhalla a sheomra leapa.
Arsa Aodhán faoina chuid streachailte, “Tá mé tinn tuirseach den droch-chodladh a bhí agam le blianta anuas. Ní amháin go gcuireann an tuirse leanúnach agus an easpa fuinnimh isteach ormsa, ach ar mo chuid cairde agus ar mo theaghlach chomh maith. Shíl mé gur deis mhaith a bhí sa phodchraoladh seo na fadhbanna seo a réiteach mar is ceart.”
I rith na sraithe beidh Aodhán ag bualadh le saineolaithe agus aíonna speisialta leis an chodladh agus an neamhchodladh a phlé. Ina measc, beidh an saineolaí cothúcháin agus tionchaire Kate McDaid, an saineolaí ióga Naoise Ní Bhroinn, agus an dearthóir tí Emer Mhic an Fháilí. Múineann an ceoltóir mór le rá Pádraigín Ní Uallacháin suantraí dó, agus cluineann sé seanchas faoin chodhladh ó Dhubhán Ó Longáin.
Fiosróidh Aodhán cad iad na himpleachtaí atá ag an strus, aiste bia, modh maireachtála, dearcthaí cultúrtha agus tuilleadh eile ar an chaighdeán codlata atá againn. Roinnfidh sé a chuid eispéiris phearsanta féin agus cluineann sé scéalta daoine eile faoi cén dóigh a réitítear an neamhchodladh.
Arsa Aodhán, “Le linn na sraithe, fuair mé amach gurb é an codladh an eochair dhraíochta le sláinte níos fearr a bheith againn, ach ní minic a thugann muid go leor airde dó. Tá súil agam go gcuideoidh an tsraith seo le daoine titim i ngrá leis an chodladh arís.”
Tá gach eagrán den phodchraoladh ar fáil ar Spotify inniu (15 Meán Fómhair) agus is féidir tuilleadh a fhoghlaim faoi na rannpháirtithe ar mheáin shóisialta Macha Media.
The post Podchodl-Podchraoladh nua ar an Neamhchodladh le hAodhán Ó Baoill appeared first on NÓS.
