Údar mórtais “don náisiún” ab ea bua Rory McIlroy sa US Masters in Augusta Georgia, a deir an Taoiseach.
Tá McIlroy sa Táin ó d’éirigh leis aréir an tseaicéid ghlas a bhuachan den chéad uair. Ba é an Masters an t-aon mhórchomórtas nach raibh buaite ag galfaire Ard Mhic Nasca. Fágann a bhua, i ndiaidh babhta a bhí lán teannais agus a bhí idir dhá cheann na meá go dtí an deireadh, gurb é an chéad duine le 25 bliain anuas ar éirigh leis na ceithre mhórchomórtas a bhuachan.
Cúigear eile a dhein an gaisce sin, Gene Sarazen i 1935, Ben Hogan i 1953, Gary Player i 1965, Jack Nicklaus i 1966 agus Tiger Woods in 2000.
Dúirt an tUachtarán Micheál D Ó hUigínn gur “éacht amach is amach” a bhí déanta ag McIlroy.
Dúirt an Taoiseach Micheál Martin gur ócáid iontach náisiúnta a bhí i mbua McIlroy, ócáid go gcuimhneofar ar feadh i bhfad uirthi.
“Chuir sé i gcuimhne dom George Hamilton agus Packie Bonner agus ‘a nation holds its breath’.
“Bhuel baineadh an anáil dínn gach cúig nóiméad ar feadh cúpla uair a chloig maith inné.
“Bhí an anáil á coinneáil istigh againn do gach amas agus gach tíbhuille, ach b’iontach an ócáid í. Ócáid í go gcuimhneoimid ar fad uirthi.”
“Sárú ar gach dúshlán a bhí ann. Léiríodh dúinn tráthnóna inné teacht aniar thar an gcoitiantacht.”
Eiseamláir iontach do dhaoine óga a bhí i McIlroy, a dúirt an Taoiseach.
“Is údar mórtais don náisiún Éireannach a bheith anois áirithe leis an gcúigear sárimreoirí eile i dTeampall Déithe an Ghailf.”
Dúirt Céad-Aire an Tuaiscirt Michelle O’Neill go raibh bród an domhain ar dhaoine mar gheall ar ghaisce McIlroy agus gurb iontach an t-ambasadóir é.
“An teachtaireacht shoiléir atá aige don uile dhuine óg amuigh ansin ná má tá aisling agat is féidir leat í a fhíorú.
“Féach ar aistear Rory le blianta fada agus na buillí móra a buaileadh air agus féach gur tháinig sé ar ais arís agus arís eile.
“Mar sin, is cinnte gur chóir dúinn cóisir mhór a bheith againn.”
Chinntigh McIlroy go mairfidh a cháil go deo in annála an spóirt nuair a fuair sé an ceann is fearr ar Justin Rose ar pholl réitigh chun an Masters a bhuachan. Chuaigh sé síos ar a dhá ghlúin agus thosaigh sé ag gol nuair a rinne sé an beart ar deireadh.
“An rud a tharla dom ar an bplásóg dheireanach sa pholl réitigh ná gur scaoil mé leis na mothúcháin go léir a bhí faoi chois ionam le ar a laghad 11 bliain, nó b’fhéidir fiú 14 bliain,” a dúirt sé.
Ba é bua na hoíche aréir an chéad mhórchomórtas a bhuaigh McIlroy ó 2014 agus tá 14 bliain ann ó chaill sé an Masters in ainneoin é a bheith ceithre bhuille chun cinn ag tús na himeartha Dé Domhnaigh.
