Ceardlann cheoil d’fhoghlaimeoirí Gaeilge in Ard Mhacha

Cuireadh ceardlann cheoil ar siúl in Aonach Mhacha Dé Sathairn, ceardlann a bhí dírithe ar fhoghlaimeoirí Gaeilge.

Bhí réimse de cheol le cluinstin le linn na ceardlainne, idir amhráin thraidisiúnta agus chinn nua-aimseartha a aistríodh ón Bhéarla. Ba é sprioc na ceardlainne ná úsáid a bhaint as an cheol le píosa Gaeilge a mhúineadh do na foghlaimeoirí a bhí i láthair. Freastalaíonn cuid mhaith acu ar ranganna Gaeilge in Aonach Mhacha agus bhí sé mar aidhm ag Eoin Ó Ceallaigh, éascaitheoir na ceardlainne, cur leis an fhoghlaim seo ar bhealach éagsúil ón ghnáthrang teanga agus Gaeilge shaibhir na seanliricí a thaispeáint dóibh.

Labhair Meon Eile le hEoin agus le Tomás Ó Mealláin a d’fhreastail ar ranganna Gaeilge in Aonach Mhacha ar feadh na mblianta ach atá anois ag déanamh dioplóma sa teanga ar Ollscoil Uladh.