Céatadán níos mó daltaí scoileanna lán-Ghaeilge ná daltaí scoileanna táille ag dul ar aghaidh go dtí an tríú leibhéal
Dé Máirt, Nollaig 10 2024 ag 2:12 pm
Téann céatadán níos airde de dhaltaí scoileanna lán-Ghaeilge ar aghaidh go dtí institiúidí tríú leibhéal ná mar a théann daltaí ó scoileanna táille, de réir figiúirí nua.
De réir eolais a foilsíodh san Irish Times agus san Irish Independent ar maidin, bhí Coláiste Íosagáin i mBaile Átha Cliath ar bharr liosta na scoileanna ar fad sa stát maidir le soláthar mac léinn d’institiúidí tríú leibhéal i mbliana.
Trí cinn de ghaelcholáistí eile a bhí i measc an 20 iarbhunscoil is mó a sholáthair mic léinn d’institiúidí tríú leibhéal. Bhí Coláiste an Phiarsaigh i nGleann Maghair i gCorcaigh sa seachtú háit agus bhí Coláiste Pobail Osraí i gCill Chainnigh sa deichiú háit. Bhí Coláiste Eoin, atá ar an gcampas céanna le Coláiste Íosagáin, sa 14ú háit agus bhí Gaelcholáiste Cheatharlach sa 19ú háit.
96.4% de dhaltaí Ardteiste i scoileanna lán-Ghaeilge nach scoileanna DEIS iad a chuaigh ar aghaidh go dtí an tríú leibhéal, i gcomparáid le 92.4% i gcás scoileanna táille. 79.6% an meán náisiúnta a bhí ann do gach cineál scoile.
Maidir leis na scoileanna DEIS lán-Ghaeilge, chuaigh níos lú daltaí i mbliana ar aghaidh go dtí institiúid tríú leibhéal ná an meán náisiúnta. 55.9% a bhí i gceist i gcás scoileanna DEIS lán-Ghaeilge i gcomparáid le 63.8% i gcás scoileanna DEIS Béarla.
68% de dhaltaí scoileanna DEIS lán-Ghaeilge a chuaigh ar aghaidh dtí institiúid tríú leibhéal anuraidh.
Bíonn roinnt conspóide ag baint i gcónaí le liostaí seo na scoileanna freastail nó ‘feeder’. Dar le go leor saineolaithe oideachais nach dtugann liostaí dá leithéid léargas cruinn ar fheabhas scoile mar gheall ar a chúinge is atá na critéir agus an dearcadh a léirítear iontu ar cad is oideachas ann.
