Tá beirt pháistí i measc an dáréag a maraíodh nuair a phléasc Iosrael na mílte glaoire sa Liobáin, a deir na húdaráis sláinte ansin.
Tuairiscítear gur chuir Mossad, áisíneacht faisnéise Iosrael, ábhar pléasctha sna mílte glaoire roinnt míonna sular seoladh chuig Hezbollah iad.
Idir 2,750-2,800 duine a gortaíodh san ionsaí a deir na húdaráis sláinte sa Liobáin.
Tá ospidéal na Liobáine faoi bhrú mór i ndiaidh an ionsaí inár maraíodh ar a laghad dáréag. Tuairiscítear gur fágadh daoine eile dall i ndiaidh an ionsaí agus go raibh gá ag daoine eile le teascadh.
Tuairiscítear chomh maith gur amhlaidh gur shocraigh Iosrael na glaoirí a phléascadh níos luaithe ná mar a bhí beartaithe acu toisc go raibh imní orthu go raibh eolas faighte ag Hezbollah faoin bplean.
Thosaigh Hezbollah ag úsáid glaoirí níos luaithe i mbliana nuair a cinneadh cosc a chur ar fhóin shoghluaiste toisc go raibh sé ró-éasca a dhéanamh amach cá raibh siad.
Bhí branda comhlacht as an Téaváin, Gold Apollo, ar na glaoirí ach dúirt an comhlacht sin gur comhlacht san Ungáir a rinne iad.
Meastar gur dócha gur 20 gram d’ábhar pléasctha ar chaighdeán míleata a cuireadh sna huirlisí.
Fágann an t-ionsaí go bhfuil sé ina imní mhór arís nach fada go mbeidh sé ina chogadh dearg idir Iosrael agus
Hezbollah.
Deir Hezbollah go mbainfidh siad díoltas amach i ndiaidh an ionsaithe, an sárú is mó riamh ar chóras slándála na Liobáine.
Tá coimhlint thrasteorann ar siúl idir Hezbollah agus Iosrael ó thosaigh an cogadh in Gaza mí Dheireadh Fómhair seo caite.
