Tá cás gnó do cheannach Aerfort na Mine i gConamara anois á mheas ag oifigigh Roinn na Gaeltachta.
Seo an chéim is déanaí i bplean na Roinne an t-aerfort Gaeltachta a cheannach don Stát.
Tuairiscíodh an tseachtain seo caite go raibh Roinn na Gaeltachta agus Aer Árann tagtha ar aon intinn faoi luach an aerfoirt i gCois Fharraige agus praghas socraithe eatarthu.
Dhiúltaigh an Roinn a rá le Tuairisc.ie cén praghas a cuireadh ar an aerfort ar le húinéir Aer Árann, an Seanadóir neamhspleách as an Spidéal Pádraig Ó Céidigh, é.
Mar chuid den phróiseas sin fostaíodh comhlacht eitlíochta chun cás gnó don aerfort a ullmhú.
Dheimhnigh Aire Stáit na Gaeltachta Seán Kyne don Dáil go raibh an cás gnó sin faighte anois ag a roinn agus é “á mheas faoi láthair”.
Bhí súil aige, a dúirt sé, go dtabharfaí faoi “na chéad chéimeanna” eile sa phróiseas ceannacháin “go luath”.
Deireadh mhí an Mhárta an spriocam a bhí leagtha síos ar dtús don idirbheartaíocht faoi cheannach an aerfoirt. Dúradh an t-am sin gur easaontas faoi luach an aerfoirt ba chúis leis an moill ar an phróiseas.
Tiocfaidh deireadh le conradh eatramhach an Galway Aviation Services Ltd, atá i mbun na seirbhíse aeir go dtí trí oileán Árann faoi láthair, ag deireadh na míosa seo.
Dúirt Seán Kyne go bhfuil a Roinn “ag gníomhú chun a chinntiú nach mbeadh briseadh sa tseirbhís agus go mbeidh conradh eile socraithe go luath”.
I mí Dheireadh Fómhair seo caite a chéad léirigh Roinn na Gaeltachta suim i gceannach aerfort na Mine. Chuir Aer Arann in iúl don Roinn an uair sin go mbeadh siad ag tarraingt siar ón dá chonradh atá acu i dtaobh na seirbhíse – an conradh don tseirbhís féin agus an conradh d’úsáid Aerfort na Mine i gCois Fharraige.
Dúirt an Seanadóir Pádraig Ó Céidigh le Tuairisc.ie anuraidh go raibh sé “breá sásta” Aerfort na Mine agus Aer Arann féin a dhíol leis an Stát.
