Beidh Jeaic Ó Domhnaill, as Tír an Fhia, Conamara, ag glacadh páirt i gcraobhchomórtas na gceard oilte ‘Worldskills’ in Kazan na Rúise an mhí seo.
Ainmníodh Ó Domhnaill mar ‘Seaimpín Pluiméireachta na hÉireann’ i mí an Mhárta seo caite, agus thug sé leis an chéad duais i rannóg na pluiméireachta i gcomórtas náisiúnta ‘Worldskills’.
Ní fada anois go mbeidh Ó Domhnaill ag dul san iomaíocht le plúr na bpluiméirí ó thíortha eile ar fud an domhain sa chraobh idirnáisiúnta, a reáchtálfar i gcathair Kazan, in iardheisceart na Rúise ón 22-27 Lúnasa.
Iomaitheoirí ó 63 tír a bheas ag glacadh páirt sa mhórchomórtas ceirde sin a thugann aitheantas do bhreis is 50 ceird ó réimse leathan tionscal, lena n-áirítear tionscal na gruagaireachta, na háilleachta, na báicéireachta, na hailtireachta, na tógála agus na dearthóireachta.
Ag labhairt dó le Tuairisc.ie, dúirt Ó Domhnaill, go raibh sé “ag tnúth go mór” le páirt a ghlacadh i gcraobh dhomhanda na pluiméireachta cé gur aithin sé go raibh “dúshlán mór” roimhe.
“Ní raibh mé ag cuimhneamh ar a ghabháil chun na Rúise ar chor ar bith. Is cinnte go mbeidh dianchomórtas ann. Beidh muid ag obair go docht go dtí an milliméadar,” a dúirt Ó Domhnaill.
Mairfidh an chraobh pluiméireachta ceithre lá, agus beidh ar na hiomaitheoirí pluiméireacht a dhéanamh ar theach, “díreach mar a bheadh le déanamh agat i gcás fíortheach”.
“Braitheann sé uilig ar thoisí, cruinneas agus luas na hoibre. Obair chrua a bheas ann agus is cinnte go mbeidh uaireanta fada i gceist,” a dúirt Ó Domhnaill.
Iardhalta de chuid Scoil Chuimsitheach Chiarán ar an gCeathrú Rua é Ó Domhnaill agus nuair a chríochnaigh sé ar scoil thosaigh sé printíseacht ceithre bliana le Terrance McDonagh, pluiméir as an Tulaigh.
Tá sé i mbun tréimhse traenála trí mhí faoi láthair in Institiúid Teicneolaíochta Chorcaí agus é ag ullmhú don chraobhchomórtas sa Rúis.
“Obair chrua atá i gceist i gCorcaigh, bíonn tú ann óna hocht go dtí a hocht chuile lá ach bíonn tú ag foghlaim go leor, ” a dúirt Jeaic Ó Domhnaill.
