Oidhreacht Ghaelach Kermit the Frog
Cúpla mí ó shin, scríobh ár gcolúnaí Dennis King faoin bhfuaim a bheadh ag frog Gaelach, agus chuir a alt ag smaoineamh mé faoin bhfrog is cáiliúla amuigh, frog a bhfuil oidhreacht Ghaelach aige — Kermit the Frog.
“Oidhreacht Ghaelach ag Kermit the Frog?” a deir tú. Ar as Frogmore, Contae Chiarraí a fáisceadh a mhuintir? An é Glas na hÉireann (Pantone 347 más cuma leat), dath a chraicinn agus a fhola? An de shliocht uasal froganna a d’fhógair fáin ar Ghallaibh é? Seans maith agus ainm breá Gaelach air.
Sea, is ainm Gaelach é ‘Kermit’, cé go gcaithfear roinnt oibre a dhéanamh le teacht ar a bhunús. Leagan truaillithe den sloinne ‘Mac Diarmada’ atá i gceist le Kermit, agus cé go bhfuil roinnt daoine dar sloinne sin in iarthar na hÉireann, is annamh a aimsítear sa tír seo anois é.
Tá leagan eile de i bhfad níos coitianta in Oileán Mhanann agus maítear gur ceangal Manannach a thug a ainm don fhrog cáiliúil. ‘Kermode’ an leagan sin, leagan Manainnise atá beagán níos giorra don leagan Gaeilge ‘Mac Diarmada’.
Is minic a bhíodh séimhiú ar an bhfocal ‘mac’ agus ina dhiaidh i gcás sloinnte, cé nach é sin an leagan is coitianta anois, agus níl sé deacair an ceangal idir ‘’ac Dhiarmada’ na Gaeilge agus ‘Kermode’ na Manainnise a fheiceáil.
Maith go leor, a deir tú, ach cén fáth ar thug Jim Henson Kermit/Kermode/Mac Diarmada ar fhrog The Muppets? Níltear iomlán cinnte.
Táthar ann a mhaíonn gur as cara scoile, Kermit Scott, de chuid Henson a ainmníodh an frog cáiliúil, ach shéan Henson féin é sin. Shéan an Comhlacht Jim Henson gur Scott a thug a ainm don fhrog arís, i ndiaidh bhás an phuipéadóra.
Bhí cúpla duine eile i measc lucht aitheantais Jim Henson darbh ainm Kermit — Kermit Cohen, a bhí ina oibrí fuaime ag stáisiún teilifíse a raibh Henson ag obair ann, agus Kermit Love, dearthóir seite de chuid ar The Muppets. Bhí Kermit the Frog ‘ar an saol’ sular casadh Love agus Hensen ar a chéile, áfach.
Sular bhain Jim Henson agus a chuid puipéad cáil amach, is dóigh gurbh é Kermit Roosevelt an duine ba cháiliúla faoin ainm. Mac leis an uachtarán Theodore Roosevelt a bhí i Kermit, a bhain cáil dá chuid féin amach mar fhear gnó agus mar scríbhneoir. Scríobh sé faoina thaithí mar shaighdiúir sa gCogadh Mór.
Ainmníodh Kermit Roosevelt féin as a mháthair, Edith Kermit Carow roimh phósadh di. Kermit ab ainm dá deartháir nár mhair an bhliain féin agus a bhásaigh tamall de mhíonna sular rugadh Edith. Roghnaigh a tuismitheoirí a hainm in ómós uncail a hathar, Robert Kermit. Rugadh athair Robert Kermit in New York in 1754, ach ní taifead ann de dhuine ar bith dá shinsir roimhe sin. Cá bhfios cé as a dtáinig an chéad ‘Mhac Dhiarmada’ go Meiriceá?
Maidir leis an nGael mór, Kermit the Frog, d’fhill sé ar a dhúchas nuair a tháinig TG4 ar an bhfód. Agus é ag caint ar bhuaicphointí athbheochan na Gaeilge, dúirt an file aitheanta Louis de Paor gur céim mhór chun cinn a bhí ann nuair a “labhair Kermit the Frog ceartGhaolainn chruinn le Debbie Harry agus gur “thuig sí gach aon fhocal di”.
