Tá ráite ag Cathaoirleach Choiste Oireachtais na Gaeilge Catherine Connolly gur “ábhar díomá” é nár chinntigh RTÉ agus TG4 gur i nGaeilge a bheadh a bpobalbhreith iarvótála sa Ghaeltacht.
Tuairiscítear go ndearnadh roinnt gearán i mbothán vótála i nGaeltacht Chonamara faoi gan aon Ghaeilge a bheith ag an oibrí ón gcomhlacht RED C a bhí i mbun na pobalbhreithe ansin don dá chraoltóir.
Rinne fear Gaeltachta a labhair faoin scéal ar Adhmhaidin ar RTÉ Raidió na Gaeltachta inné gearán le TG4 agus RTÉ toisc gur i mBéarla a reáchtáladh an phobalbhreith i Scoil Sailearna in Indreabhán i gCois Fharraige i gceartlár na Gaeltachta.
Dúirt Séamus Ó Tuairisg gur chuir sé “iontas an diabhail” air nár earcaíodh Gaeilgeoir chun na ceisteanna a chur ar mhuintir na Gaeltachta.
Mhaígh sé gur bhain an scéal preab chomh maith as an té ar labhair sé leis faoi i TG4.
Ghlac 3,000 duine páirt i bpobalbhreith TG4 agus RTÉ, a reáchtáil an comhlacht Red C, ag breis is 150 ionad vótála éagsúla ar lá na dtoghchán.
Bhain roinnt ceisteanna sa phobalbhreith le tábhacht na Gaeilge ach is i mBéarla amháin a cuireadh na ceisteanna go léir sa Ghaeltacht.
I ráiteas a chuir TG4 ar fáil faoin cheist dúradh gur “comhlacht neamhspleách, gairmiúil taighde iad Red C” agus nach raibh “aon ról ag TG4 sa chur chuige a stiúradh”. Thug an stáisiún le fios áfach nár tugadh aon treoir do Red C maidir le seirbhís Ghaeilge a chur ar fáil sa Ghaeltacht.
“Is oth linn má bhí duine ar láthair Ghaeltachta nach raibh ábalta na ceisteanna a chur i nGaeilge. Má bhíonn baint againn arís lena leithéid de thaighde tabharfar treoir go mbeadh duine le Gaeilge ar fáil ag aon ionad Gaeltachta a bhíonn ann,” a dúradh sa ráiteas.
Dúradh freisin go raibh TG4 “an-sásta gur éirigh le TG4 agus RTÉ a bheith páirteach sa phobalbhreith iarvótála RedC” agus gur “chuir sé go mór leis an gclúdach a rinne RTÉ agus TG4 ar na toghcháin”.
I ráiteas a fuair Tuairisc.ie ó RTÉ, dúradh:
“Ní bheadh sé mar rogha agallamh pobalbhreithe a dhéanamh i nGaeilge in aon taighde eile a dhéanann Red C, agus bíonn siad i mbun taighde ar fud na tíre.
“Agus, cé go bhfuil cuid den phobal nach mbeadh sásta, b’fhéidir, páirt a ghlacadh san agallamh de bharr é a bheith i mBéarla, glacann formhór na ndaoine páirt ann ina ainneoin sin.”
“Cuireadh an-chuid daoine faoi agallamh ar an Aoine, ach is ábhar é seo go mbeidh athbhreithniú á dhéanamh air do thaighde i gceantair Ghaeltachta amach anseo,” a dúradh sa ráiteas.
Dúirt Cathaoirleach Choiste Oireachtais na Gaeilge, na Gaeltachta agus na nOileán go mbíonn “chuile eagraíocht den tuairim go bhfuil siad ag déanamh a ndíchill” ó thaobh na teanga ach gur “a mhalairt” a tharla sa chás seo. Dúirt an Teachta Dála neamhspleách Catherine Connolly gur “ábhar díomá” an scéal.
